இறுதிக்கட்ட போரில் ஈடுபட்ட மஹிந்தவும் சோனியாவும் போர்க்குற்றவாளிகள்! ரணில் அதிரடி

தமிழினத்திற்கு எதிராக முன்னெடுக்கப்பட்ட இறுதிக்கட்ட போரின் போது முழுமையான பங்களிப்பை இந்தியா வழங்கியதாக பிரதமர் ரணில் விக்கிரமசிங்க தெரிவித்துள்ளார்.

 

இந்தியாவின் உதவியின்றி இறுதிக்கட்ட போரினை மஹிந்த ராஜபக்ஷவினால் வெற்றி பெற்றிருக்க முடியாது என அவர் தெரிவித்துள்ளார். 

 

இந்திய ஊடகம் ஒன்றுக்கு வழங்கிய செவ்வியின் போது, இந்த விடயத்தினை ரணில் குறிப்பிட்டுள்ளார். 

 

சிறிலங்காவில் கடந்த 2009ல் விடுதலைப் புலிகளுக்கு எதிராக நடந்த இறுதிக்கட்டப் போரை நடத்த இந்தியா உதவியது. இந்திய உதவி இல்லாமல் ராஜபக்ஷ அரசால் விடுதலைப்புலிகளை வீழ்த்தியிருக்க முடியாது. 

 

இந்திய உதவியைப் பெறுவதற்கு சிறிலங்காவின் 13ஆவது அரசியலமைப்பு திருத்தம் உள்ளிட்ட பல்வேறு வாக்குறுதிகளை ராஜபக்ஷ அறிவித்தார். ஆனால், அதை அவர் நிறைவேற்றவில்லை. 

 

போரில் உதவியதை இந்திய அரசியல்வாதிகள் வேண்டுமானால் மறுக்கலாம். ஒருவேளை இந்திய அரசியல்வாதிகளுக்கு அம்னீசியா ஏற்பட்டிருக்கலாம். ஆனால், இந்தியா உதவியது என்பதே உண்மை. 

 

இறுதிக்கட்ட போரில் மனித உரிமை மீறப்பட்டது குறித்து சர்வதேச விசாரணை நடத்தப்பட வேண்டும். அதுவும், 1970 காலகட்டத்தில் இருந்து நடத்தப்பட்ட தாக்குதல்கள் தொடர்பாக விசாரணை நடத்தப்பட வேண்டும் என வடக்கு மாகாண முதல்வர் சி.விக்னேஸ்வரன், பொறுப்பற்ற ஒரு தீர்மானம் நிறைவேற்றியுள்ளார். 

 

அவரது தீர்மானத்தின்படி விசாரணை செய்தால் சிறிலங்கா அரசு, விடுதலைப் புலிகள் மட்டுமல்லாது அப்பாவி உயிர்கள் பறிபோனதற்கு சிறிலங்காவுக்கு அனுப்பபட்ட இந்திய அமைதிப் படையும் காரணமாகும். எனவே படுகொலைகளுக்கு சிறிலங்காவை மட்டும் காரணம் கூறுவது சரியாகாது. விசாரணை அனைத்து தரப்பினரும் மீது நடத்தப்பட வேண்டும் என ரணில் மேலும் தெரிவித்துள்ளார்.

 

இறுதிக்கட்ட போர் நடைபெற்ற போது, இந்தியாவில் சோனியா காந்தி தலைமையிலான காங்கிரஸ் கட்சி ஆட்சியில் இருந்தமை குறிப்பிடத்தக்கது.