கிறிஸ் கெய்லை பின்னுக்குத் தள்ளி வீரேந்திர ஷேவாக் சாதனை

IPL போட்டிகளில் அதிக பவுண்டரிகளை அடித்து வீரேந்திர ஷேவாக், கிறிஸ் கெய்லை பின்னுக்குத் தள்ளி முதலிடத்தைப் பிடித்துள்ளார்.

நடைபெற்றுவரும் 8 ஆவது IPL போட்டியில் இந்திய அணியின் முன்னாள் அதிரடி வீரர் வீரேந்திர ஷேவாக் கிங்ஸ் லெவன் பஞ்சாப் அணியில் விளையாடி வருகிறார்.

அவர் 15ஆம் திகதி டெல்லி டெயார் டெவில்ஸ் அணிக்கு எதிராக புனேவில் நடைபெற்ற போட்டியில் 41 பந்துகளில் 47 ஓட்டங்களைக் குவித்தார். அதில் 4 நான்கு ஓட்டங்களும், 2 ஆறு ஓட்டங்களும் அடங்கும்.

ஷேவாக் இதுவரை 99 ஆட்டங்களில் விளையாடி 332 நான்கு ஓட்டங்களையும், 106 ஆறு ஓட்டங்களையும் அடித்துள்ளார்.

மொத்தம் 438 பவுண்டரிகளை அடித்துள்ளார்.

இதற்கு முன்னர் பெங்களூர் அணியில் இடம்பெற்றுள்ள மேற்கிந்திய அணி வீரர் கிறிஸ் கெய்ல் IPL இல் அதிக பவுண்டரிகளைப் பெற்றவர் என்ற சாதனையை நிலைநாட்டியிருந்தார்.

கிறிஸ் கெய்ல் இதுவரை 70 ஆட்டத்தில் விளையாடி 232 நான்கு ஓட்டங்களையும், 200 ஆறு ஓட்டங்களையும் அடித்துள்ளார். ஆக மொத்தம் 432 பவுண்டரிகளை அவர் அடித்திருந்தார்.

அந்த சாதனையை இந்திய வீரர் ஷேவாக் தற்போது முறியடித்துள்ளார்.

மேலும், ஷேவாக் அனைத்து வகையான 20 ஓவர் போட்டிகளையும் சேர்த்து 4000 ஓட்டங்களைக் கடந்துள்ளார். இதன் மூலம், உலக அளவில் 20 ஓவர் போட்டிகளில் 4000 ஓட்டங்களைக் கடந்த 25ஆவது வீரர் என்ற பெருமையைப் பெற்றார்.

இந்திய வீரர்களில் 7ஆவது வீரர் என்ற பெருமையையும் பெற்றார்.

இதற்கு முன்பு இந்திய வீரர்களில் சுரேஷ் ரெய்னா, ரோகித் சர்மா, கவுதம் கம்பீர், விராட் கோலி, மகேந்திர சிங் டோனி, ரொபின் உத்தப்பா ஆகியோர் 4 ஆயிரம் ஓட்டங்களைக் கடந்துள்ளனர்.

IPL கிரிக்கெட் போட்டிகளில் அதிக ஸ்டிரைக் சைட் வைத்திருப்பவரும் ஷேவாக் தான்.

99 ஆட்டங்களில் விளையாடி 2712 ஓட்டங்களைக் குவித்துள்ளார்.
சராசரி ஓட்ட விகிதம் 28.85 ஆகும். அவரது ஸ்ட்ரைக் ரைட் 156.58 என்பது குறிப்பிடத்தக்கது.