டி20 மட்டுமல்ல அனைத்து போட்டிகளிலும் மிரட்டுவேன்: கிறிஸ் கெய்ல்

நான் அனைத்து விதமான போட்டிகளிலும் அதிரடி காட்டுவேன் என்று மேற்கிந்திய தீவுகளின் 'மிரட்டல் மன்னன்' கிறிஸ் கெய்ல் தெரிவித்துள்ளார்.
ஐபிஎல் போட்டிகளில் அதிரடி காட்டிய மேற்கிந்திய தீவுகளின் வீரர் கிறிஸ் கெய்ல், தற்போது இங்கிலாந்தில் நடக்கும் டி20 தொடரிலும் பட்டையை கிளப்புகிறார். இதனால் கெய்ல் டி20 போட்டிகளுக்கு ஏற்ற வீரர் என்று அழைக்கப்படுகிறார்.

இது தொடர்பாக இணையதளம் ஒன்றிற்கு பேட்டியளித்த கிறிஸ் கெய்ல், நான் டி20 போட்டிகளில் மட்டுமல்ல ஒருநாள் மற்றும் டெஸ்ட் போட்டிகளிலும் அதிரடி காட்டுவேன் என்று தெரிவித்துள்ளார்.

அவர் மேலும் கூறுகையில், நான் டெஸ்ட் போட்டியில் இரண்டு முச்சதங்கள் அடித்துள்ளேன். 21 ஒருநாள் போட்டிச் சதங்களும் கூட அடித்துள்ளேன். அதனால், சகல வகை கிரிக்கெட்டுக்கும் ஏற்ற வீரர் நான்.

டி20 கிரிக்கெட்டால் பல புதிய ரசிகர்கள் இந்த விளையாட்டுக்குக் கிடைத்திருக்கிறார்கள். ஆகவே டி20 கிரிக்கெட்டையும் நாம் தொடரவேண்டும்.

என்னை அணியில் சேர்க்க ஆர்வமாக உள்ளார்களா என்று தெரியவில்லை. ஒரு நல்ல முடிவு எட்டப்படும் என எதிர்பார்க்கிறேன்.

சொந்த ஊருக்குத் திரும்பிய பிறகு பயிற்சியாளர் மற்றும் கிரிக்கெட் வாரியத்துடன் இது தொடர்பாக பேச்சுவார்த்தை நடத்துவேன் என்று கூறியுள்ளார்.