தேர்தலில் ராதாரவியுடன் மோதும் விஷால்… வெல்லப்போவது யார்…?

நடிகர் சங்கத்திற்கு அடுத்த மாதம் தேர்தல் நடக்கிறது. இந்த தேர்தலில் தலைவர் பதவிக்கு சரத்குமார் தலைமையிலான அணி மீண்டும் போட்டியிடுவதாக அறிவித்துள்ளது. மேலும், பொதுச்செயலாளர் பதவிக்கு ராதாரவி போட்டியிடுகிறார். தற்போது ராதாரவி உள்ளிட்ட சரத்குமார் தலைமையிலான அணியினர் தங்களுக்கு ஆதரவு திரட்டும் பணியில் தீவிரமாக இறங்கியுள்ளனர்.

இந்நிலையில், நடிகர் சங்க தேர்தலில் விஷால் போட்டியிடப் போவதாக அறிவித்துள்ளார். தனியார் தொலைக்காட்சியில் ‘ஆயுத எழுத்து’ நிகழ்ச்சியின்போது நடிகர் சங்க தேர்தல் குறித்து விவாதம் நடந்தது. அப்போது தொலைபேசியில் தொடர்புகொண்டு பேசிய நடிகர் விஷால், நடிகர் சங்கத் தேர்தலில் பொதுச் செயலாளர் பதவிக்கு ராதாரவியை எதிர்த்து நான் களமிறங்கப் போகிறேன் என்று கூறினார். எனவே, தற்போது நடிகர் சங்க தேர்தல் சூடு பறக்கும் களமாக மாறத் தொடங்கியுள்ளது.

இந்த விவாதத்தில் நடிகர் சங்க பொதுச்செயலாளர் ராதாரவி, நடிகர் எஸ்.வி.சேகர், தயாரிப்பாளர் ராஜன் ஆகியோரும் கலந்துகொண்டு நடிகர் சங்க தேர்தல் குறித்து விவாதித்தனர் என்பது குறிப்பிடத்தக்கது.